«ՏԱՀԵՇ կը յառաջանայ դէպի Հալէպ` Այդ մէկը միջազգային ընտանիքին համար զայն կասեցնելու
առիթ մըն է» ըսաւ Տը Միսթուրա
Սուրիոյ հարցով ՄԱԿ-ի պատուիրակ Սթեֆան Տը Միսթուրա նշեց, որ «ՏԱՀԵՇ դէպի Հալէպ կը յառաջանայ»`
աւելցնելով. «Այդ մէկը միջազգային ընտանիքին համար զայն կասեցնելու առիթ մըն է»: Տը
Միսթուրա «Սի.Էն.Էն.»-ի հետ հարցազրոյցի մը ընթացքին նշեց. «Եթէ այս քարտեսին նայիս,
կը նշմարես, որ ՏԱՀԵՇ Արաբ Բունարէն հեռու` դէպի Հալէպ կը յառաջանայ, եւ եթէ այդ մէկը
շիտակ է, ապա ատիկա առիթ մըն է փրկելու այս քաղաքը, որ թատերաբեմ դարձաւ սուրիական ընդդիմութեան
եւ կառավարութեան միջեւ կռիւի մը, որ որեւէ արդիւնք չտուաւ»: «Ըսել ուզածս այն է,
որ կասեցնելու համար ՏԱՀԵՇ-ը, որուն վրայ կեդրոնացած են բոլորը, ապա առնուազն պէտք է
այլ վայրերու մէջ կռիւը սառեցնել, որպէսզի կարելի ըլլայ այդ կազմակերպութեան վրայ կեդրոնանալ,
իսկ Հալէպը այն քաղաքներէն մէկն է, ուր կարելի է այդ ծրագիրը գործադրել»: ՄԱԿ-ի յատուկ
պատուիրակը յայտնեց. «Բոլորը համաձայն են, որ ՏԱՀԵՇ ներկայիս մեծագոյն վտանգն է: Միջազգային
ընտանիքին ըսել փորձածս այն է, որ եթէ գոյութիւն ունենայ Արաբ Բունարի պէս քաղաք մը եւ
որոշեց ՏԱՀԵՇ-ի դէմ կենալ, ապա պէտք չէ զայն լքենք»: Ինչ կը վերաբերի սուրիական տագնապի
լուծման իր ծրագիրին, Տը Միսթուրա նշեց. «Անիկա շատ պարզ սկզբունքի վրայ հիմնուած է.
փորձուեցաւ ամէն բան` խորհրդաժողովներ, ժողովներ, խաղաղութեան հաւանական ծրագիրներ, սակայն
գետնի վրայ պէտք է սուրիացիներուն եւ աշխարհին փաստենք, որ կայ բան մը, որ կրնանք ընել.
նախ եւ առաջ` ՏԱՀԵՇ-ը կասեցնել, երկրորդ` տագնապը դադրեցնել, որպէսզի սուրիացիները տարբերութիւնը
զգան»: